. . T.A.X.I . . Posted by Mَaْrّwَa , Monday, 21 December 2009 at Monday, December 21, 2009, in

T.A.X.I ....

"..شفتى الشمس عامله ازاى ..رهيبة , وانا داخله كنت هابعتلك رسالة علشان تشوفيها بس ملحقتش كنت متأخرة..

رغم الجو العجيب والتراب اللى احنا فيه الا ان شكلها فى حاجه مبهرة .. دائرة كاملة وقوية رغم ان مفيش حواليها اى آشعة..سبحان الله"

تاكس ... ... ... تمام

لا لا معاكى..أنا بس بوقف تاكسى ..ركبت خلاص !

... ... ... أشوفك على خير..مع السلامة .

إسترخيت فى مقعدى قليلا فى محاولة فاشلة  لترتيب أفكارى المبعثرة ها هنا وهناك...هنالك الكثير مما على فعله فى الساعة القادمة..الكثير فى وقت قصير..أمقت هذا تماماً ! لماذا لا يتوقف الزمن لبرهه أنهى فيها ما أريد بهدوء ثم يعود للعمل من جديد..هذا حقاً غريب..!

هنا توقف السائق لراكب آخر..كان يرتدى كمامة ..كمامة تقيه من ذلك الكائن الصغير شديد الصغر كبير التأثير..ذلك الفيروس الضئيل تمكن من جمع العالم كله على شعور واحد ..هو الخوف , آخيراً اتفقت كل الشعوب على شعور ما !

"إنت لا بسها علشان الإنفلونزا ولا التراب.." ..قالها السائق

"علشان الإنفلونزا.."..أجاب الراكب

"عارف كل ده كلام فاضى الناس فى بلاد بره عايشين عادى من غير كمامات ولا حاجه..المرض مش خطير أصلاً الخوف ع الناس الكبيرة أو اللى عندها أمراض اللهم أحفظنا.."

"هما عايشين عادى علشان اتطعموا ..انما احنا مخدناش تطعيم..وبعدين مش شرط ناس كبيرة فى ناس سنها صغير ماتت"

"بالك اننا زيهم..عارف الآكل العادى  بتاعنا ده يحمينا من أى حاجه ..لا تقولى تطعيم ولا دياوله هو فحل البصل والثوم ع الصبح أحسن من أى حاجه..الطبقات الراقية هما اللى يتخاف عليهم..الناس ديه متعرفش يعنى اى بصل "

فحل بصل وثوم ع الصبح ..يا خبر أسود..! ..ده أنا بقول لنفسى  !

يكمل السائق.."عارف اللى حصل فى نادى نادى سبورتنج.."

"أيوه بس ده بسبب الناس اللى جايه من بره.."

"سيبك من دول..خليك فى اللى اتعدوا..ديه ناس ورق ..بقولك مبياكلوش بصل ! .."

"عارف ليه نابليون معرفش يفتح عكا..يلا أجب ..

إستدار وسألنى يلا قولى لماذا لم يستطع نابليون فتح عكا..عارفه..

ابتسمت وهززت رأسى أن لا ..

" أنت عارف..؟"

"..مش عارف..تقريباً الوباء.."

لأ ما شاء الله عبقرى ! ..ده أنا بقول لنفسى

" أيوه أيوه ..الطاعون.."

"بالظبط .."

أنا كده اللى عبقرية !..برضه بقول لنفسى ..!

"أهو ده اللى يتقال عليه مرض خطير .."

هكذا أضاف السائق حكمته  !

و

"إمبارح وانا بتصفح النت فى جوجل قريت عن حاجات new لسه مكتشفينها عن الخس..الخس بتاعنا العادى ده مش الكابوتشى لا لا التانى او أعواد وورق كتير ده.. بيقولك الفراعنة كانوا بيحترموه جداً ..والله طعمه ملوش حل وفوايده كتير.."

بتصفح النت..جوجل ..مين ده !! ...اعتدلت فى مقعدى وأخذتنى ابتسامة كبيرة وقد شعرت بأن أذناى فى طريقها للإستمتاع....ولم يخب ظنى على الإطلاق..

"خلى بالك من الغسيل ..لازم يتغسل كويس.."

"أمال..بحط عليه حبة خل..بس والله لوغسلته كويس ونقعته فى حبة ميه كفايه.."

"عارفين أنا أفهم أحسن من مية محامى وممكن أسمعلكم كتب حقوق..معايا دبلوم تجارة بس ميغركوش مثقف قوى والله "

" أكيد العلم مش بالشهادات ..البنى آدم أكبر كتير من حتة ورقة ملهاش قيمة إلا بعقل صاحبها .."

تأملت تلك النفس الثرية الممتلئه بالحياة الجالسه ها هنا أمامى ..

...الكاسكته اللى لابسها جوه عربيته رغم ان مفيش شمس,

وأيده السمرا اللى باين عليها أثر الشقا والبهدلة..

تذكرت حديث الرسول صلى الله عليه وسلم ..حينما قال هذه يد يحبها الله ورسوله..

أخذنى عالمه الساحر ..تلك التركيبة الغريبة  لن تجدها إلا فى مصرى..

ولسه ..!

" أنا ليا أصحاب من كل دول العالم..بكلمهم ع النت ..بعمل معاهم  conversation ..ما أنا لبلب فى الإنجليزى ..ده أنا خطير ..آه والله ..ليا صديقة من ولاية لويزيانا ..

تتسع عيناى وكذلك ابتسامتى ..

لسه واخده التطعيم من كام يوم..قلتها you `ll feel sick علشان متتخضيش ..أصل التطعيم ده أصله فيرس برضه ..فيرس ضعيف يعنى..

..وأحسن من مية دكتور ...

جايه مصر قريب ..مستنيها تيجى  ..

يرن هاتفه المحمول..

"....لا لا لسه مشفتهاش مكنتش ع النت امبارح..اول امبارح قالتلى .......كلام كتير عن اجراءات السفر وعن أشياء ستجلبها معها لمصر ..يبدو أنه سيعمل على بيعها ....... ما هذا ..للآسف وصلت.